Daghan na’ng kongresista nga mibakwi sa ilang YES vote sa House Bill 6875, ang Terror Bill sa administrasyong Duterte. Kanus-a mubakwi ang 3 ka kongresista sa Bohol nga pulos miboto pabor sa maong mapig-otong balaodnon?
Nanawagan ang Humabol-KMP nila ni kongresista Edgar Chatto (1st Dist.), Aristotle Aumentado (2nd Dist.) ug Alexie Tutor (3rd Dist.) sa pag-atras sa ilang boto.
Sa maong balaodnon, lapad kaayo ang depinasyon sa terorismo nga mahimong mulakip na bisan sa lehitimong mga pakigbisog sa katawhan alang sa katungod ug katilingbanong hustisya. Karon gani nga wala pa kini nahimong balaod, ang lehitimo ug progresibong mga organisasyon sa Bohol lakip na ang Humabol, ratsada na ug walay lipud-lipud nga gipasanginlan sa mga militar nga kuno front o may kalambigitan sa CPP-NPA nga giilang terorista sa gobyerno. Tungod niini’ng way basehanang pamasangil, gihimong target sa surveillance, pagpanghadlok ug pagpatay ang mga lider ug aktibong sakop sa mga progresibong pundok sa Bohol.
Labing awahing biktima sa pagpatay mao si Marlon Maldos, aktibista ug choreographer/mananayaw sa Bol-anong Artista nga may Diwang Dagohoy (Bansiwag), usa ka kulturanhong pundok nga mihimog kritiko sa kahiwian sa gobyerno ug mipakita sa panlimbasog ug panawagan sa mga gipasagdang sektor pinaagi sa teatro ug sayaw. Sa wala pa siya gipusil patay niadtong Marso 17 atol sa mga unang adlaw sa pagpailawm sa Bohol sa community quarantine, ang hulagway ni Marlon gipakuyanap sa mga sakop sa 47th IB Phil. Army dungan ang pagpasangil nga siya sakop sa NPA.
Si Alvin Fortaliza, usa ka batid nga choreographer ug mananayaw gihapon sa Bansiwag nga natudlong coordinator sa Anakpawis Partylist-Bohol, gisang-atan usab og imbentong mga kaso ug gidakop niadtong Marso 4 sa miaging tuig samtang nangampanya alang sa Anakpawis. Laing aktibong sakop sa Bansiwag, si Robbin Victor Boybanting ug Marlou Amamalin kalit lang gipangdakop niadtong Marso 24, samtang napailawm sa general community quarantine ang lalawigan, ug giplanteran og mga ebidensya ug gisang-atan sa hinimo-himong kaso sa illegal nga droga.
Gipangsaka sab sa mga sakop sa militar kuyog ang nakasbilyang mga ahente niini nga nagpailang mga taga OPAPP, ang mga lider sa Humabol sama ni Danilo Olayvar ug Joemar Pogio aron ipa-“clear” ang ilang ngalan ug pahoralon.
Wala sab palabya niining mga pasistang ahente bisan ang mga development workers nga miabag sa ekonomikanhong mga proyekto sa Humabol ug kaalyadong organisasyon sama sa pederasyon sa kababayen-an nga mao ang Sabakan-Amihan.
Si Carmilo Tabada sa non-government organization nga FARDEC (Farmers Development Center) ug Ira Pamat sa WDC (Women’s Development Center) parehong giduol niining mga ahente sa militar nga nagpailang taga-OPAPP ug gipangpugos sa pagpa-“clear” sa ilang mga ngalan.
Grabe na ang pangabuso sa militar ug kapulisan sa mga katungod sa ordinaryong sibilyan ug aktibista karong panahona. Unsa na lang kaha kun dugangan pa ang ilang gahum sa pagyatak sa mga tawo pinaagi sa pagbalaod niining Terror Bill.
Nanawagan ang Humabol sa tanang mahigugmaon sa demokrasya sa pagbarong alang sa pagdepensa sa tawhanong katungod ug makighiusa sa lapad nga katawhan aron batukan ang daw Martial Law nga balaodnon.
updates from the peasant movement of the Philippines 