[PAMANGGAS] Pagbakhu Sang Mga Mangunguma: Anhon Pa ang Kumpay Kon Patay na ang Kabayo

Abril 27, 2020

Paghugpong sang mga Mangunguma sa Panay kag Guimaras (PAMANGGAS)

Pagkatapos sang masobra na ka isa bulan nga implementasyon sang enhanced community quarantine (ECQ), mas naglapad ang insidente sang gutom sangsa Covid19. Ini bangud magluwas nga tama ka gamay, tuman man pa kahinay sang pagpanagtag sang food relief assistance sa mga pumuluyo nga napaidalum sa ECQ. Ang mga opisyales sa mga barangay ang nagasakit ang ulo bangud sang madamo nga reklamo sang ila mga pumuluyo nga gin-istriktuhan nga ihunong sa ila mga panimalay. Indi maka-igo ang calamity fund sang barangay agud pun-an ini nga kakulangon.

Sa duha tubtub tatlo ka beses nga pagpanagtag sang relief goods, maisip lang naton sa 1-2 ½ gantang lang ang napanagtag sa kada pamilya sa masobra isa ka bulan nga kwarantina.

Nagsugod na guid man ang tagtaganay sang social amelioration program (SAP) makaligad ang 1 ka bulan. Apang kaangay sang relief distribution, nagakaulihi ini kag gamay pa lang nga porsyento ang nahatagan nga mga barangay bangud sang indi maayo nga pagplano sang gobyerno. Nangibabaw ang guideline sang DSWD nga ang buot silingon, indi tanan ang mahatagan gani madamo ang nagareklamo nga ginpangtaktak sa listahan.

Suno sa KILUSANG MAGBUBUKID NG PILIPINAS (KMP), gin-ako sang DA sa ila dayalogo nga 22% pa lang sang target nga 591,000 ka mga mangunguma ang natagaan sang P5,000.00 nga suporta. Dugang sang KMP, mahinay kag sobra ka gamay pa lang ang nalab-ot sang ayuda. Nakabase pa ini sa listahan sang DSWD kag madamo sang mga rekisitos.

Samtang, sa malapit 100,000 ka mangunguma sa probinsya sang Iloilo nga may manubo pa sa 2 ektaryas nga talamnan, sulu-sobra lang sa 46,000 ang makaagum sang cash subsidy nga P5,000. Sigurado sa iban nga probinsya, limitado man ang numero sang mangunguma ang makabaton sang cash subsidy halin sa DA. Dugang pa diri ang mga mangunguma ukon mangingisda nga wala nakapasar sa mahatagan sang SAP halin sa DSWD.

Sa sumada, gamay na ang mabuligan nga mangunguma kag mangingisda, tuman pa ka hinay sang pagpanagtag sang gobyerno sang ayuda. Samtang, wala sang may mahimo ang pumuluyo kundi ang magphimuyong sa ila mga panimalay bangud sang lockdown. Ang pamangkot subong sang mangunguma kag mangingisda, san-o pa maabot ang ayuda halin sa pungsudnon nga gubyerno?

Imbes nga bulig pinansyal kag pagkaon, militarista kag pagtapak sang tawhanon nga kinamatarung ang sabat sang gobyerno sa ginabakho sang pumuluyo. Sining nagliligad lang nga inadlaw, ginmanduan ni Duterte ang iya sini kapulisan nga wala na sang pulupamangkot, diretso na lang dayon nga arestuhon ang nagalapas sa patakaran sang ECQ.
Sa militarista nga pamaagi ni Duterte sa pag-atubang sa pandemya, “wala pa makaabot ang kumpay, ang kabayo ila na ginpatay”.


Wala sang pulos ang panawagan sang gobyerno nga magbinuligay ang tanan agud batuan ang pandemya. Kapintas sa guihapon ang ginapapangibabaw sini kag indi ang paghiliugyon sang tanan.

Sining damlag lang, ginharas sang kapulisan ang ginpatigayon nga food feeding program sang BAYAN MUNA sa Molo, Iloilo, city. Nagsunod ang patraidor nga pagpatay sang 61st Infantry Batallion – Philippine Army kay John Farochilin. Bisan ang anay representante sang ANAKPAWIS Party-list kag subong Vice Chairperson sini nga si Ariel Casilao, upod sang 6 pa ka relief volunteers sang SAGIP KANAYUNAN kag TULONG ANAKPAWIS, ang gindakop kag ginpasakaan sang kaso sang kapulisan sang Norzagaray, Bulacan samtang nagapatigayon sang relief distribution.

Bugas, indi pagpamintas!
Ayuda nga medical, indi militar!
Libre nga mass testing, indi pagpamatay!

PAMANGGAS is an alliance of small peasant organisations in the islands of Panay and Guimaras. It is the Panay regional chapter of Kilusang Magbubukid ng Pilipinas

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s