Idanun ti Solidarity of Peasants Against Exploitation ti nabara a pannakikaykaysa kadagiti amin a makipagrambak iti maika-36 nga anibersaryo ti Aldaw Kordilyera itatta a tawen.

Iti paspasaren tayo ita nga Enhanced Community Quarantine wenno lockdown gapu iti COVID-19 ket maibagay unay ti temayo a: PATIBKEREN TI PANAGKAYKAYSA KEN SITUTURED A SALAKNIBAN TI ILI KEN BIAG! Maiparbeng unay ti panangpatibker iti panagkaykaysa tayo nga umili tapno labanan ken paayen ti kumarkaro a pasismo ti rehimen Duterte.

Ti mapaspasamak a panagagaw ti daga iti rehiyon Kordilyera babaen kadagiti ganggannaet ken lokal a kapitalista ket mapaspasamak met laeng iti rehiyon Ilocos, babaen kadagiti plano a dadakkel ken pangta a makadadael a proyekto kas iti dadakkel a Dam, Windmill projects, panagminas ken Eko torismo. Tunggal adda panagtignay dagiti umili tapno kontraen dagitoy a proyekto, ti kanayon a sungbat ti gobierno ket ranggas militar.

Iti Ilocos Norte, nasurok a 80 nga ektarya a daga ti illegal a nagpatakderan ti North Luzon Renewable Energy Corporation (NLREC) iti windmill project. Ribu met nga ektarya iti Pagudpud ken Adams ti agdama nga iprosproseso ti DENR tapno pagbalinen a tourist area babaen ti Adams-Patapat Wildlife Habitat Project. Kaaduan a parte dagitoy a dagdaga ket sakup ti tawid a daga dagiti nainsigudan nga umili, partikular ti Tribu nga Iyapayao. Nu maipatungpal daytoy a proyekto ket manamnama a mapapanaw ti agarup 35 a balbalay iti Sitio Maligligay, a sakop ti Adams ken mamimpinsan met a maparitan dagiti umili nga agala iti aniaman a produkto manipud iti kabakiran ken karayan, dagitoy ti nagbibiaganda iti nabayagen a panawen . Kayatna a sawen, dagitoy a proyekto ti agdama a gobierno ket awan a pulos ti pagsayaatan dagiti umili ngem ketdi bin-ig a mangdadael iti pagbiagan dagiti umili.

Iti Ilocos Sur, nakalayat met laeng ti pangta ti dakkel a proyekto a manamnama a mangdadael iti pangkabiagan dagiti umili iti maysa a baryo a masakupan ti Quirino – ti Ilocos River Transbasin Project babaen ti National Irrigation Project. Isu daytoy ti insukat ti NIA iti napaay a pangitakderna kuma iti dakkel a dam iti masakupan ti Del Pilar ken Salcedo, ngem saan a natuloy gapu napigsa, nalawa ken natibker a panangkontra dagiti umili. Kastoy met laeng ti napasamak iti Nagulian, La Union tapno napasardeng ti pannakaipatakder ti dakkel ken makadadael a dam. Amin dagitoy a proyekto ket nalawag a ladawan amin ti neoliberal a polisiya ti rehimen a Duterte gapu iti duron ti International Monetary Fund ken World Bank (IMF-WB) babaen met laeng iti diktar dagiti imperyalista a pagpagilian kangrunaanna ti Estados Unidos.

Iti napalabas nga aldaw, nagpangta manen ni Presidente Duterte nga iyetnagna ti Martial Law iti intero a pagilian nu saan kanu nga agsardeng ti “lawlessness” nga ar-aramiden kanu dagiti maka-kannigid a grupo. Ngem daytoy ket nakalawlawag a balikas ti desperado a pangulo gapu iti agtultuloy a panagraira ti corona virus desease of 2019 wenno COVID-19, gapu met laeng iti awan nalawag a plano ken addang ti administrasyonna tapno mapaksiat ti nasao a sakit.
Ngarud rumbeng laeng ti napinget a panangpatibker ken panagkaykaysa ti amin nga umili iti rehiyon Ilocos ken Kordilyera tapno agtultuloy a masalakniban dagiti karbengan tayo iti ili, daga ken biag kas nainsigudan nga umili. PAYT LATTA!

#CordiDay2020

#SolidarityAmidCovidCrisis

#TignayIlocos